O lea ua faaauau nei auaunaga a le Ofisa Tausi Mavaega poo le Public Trust i lona nofoaga fou i Matafele lea na auai ai sui o le Malo aemaise i latou o loo tautua i lenei ofisa e molimauina e tatala aloaia ai ona faitotoa i Matafele.
O le Afioga i le Sui Palemia, Tuala Tevaga Ponifasio na saunoa i lenei faamoemoe o le Ofisa Tausi Mavaega o se tasi lenei o ofisa ua leva ona iai i totonu o Samoa, ma sa amatalia ana auaunaga i le tausaga 1920 ina ua faatuina e le pulega a Niu Sila.
“Na faavaeina aloaia ma aiaia faaletulafono le ofisa ina ua faamamaluina le Tulafono Autu o le Ofisa Tausi Mavaega 1975.”
O matafaioi autu o le Ofisa Tausi Mavaega e pei ona aiaia i lalo o le Tulafono Autu o le Ofisa Tausi Mavaega 1975 e aofia ai vaega ia faama’apeina o esetete/meatotino a ē ua maliliu; aiaiga o galuega faa-Tausi Mavaega e aofia ai le puleaina o mataupu tau tamaiti ma tagata e lē atoatoa le mafaufau ma isi; tapenaina ma le tusia o mavaega/uili; ma vaaia lelei le faafaigaluegaina tatau o tupe mai esetete ma mavaega tausi.
“O le siitia o le ofisa i lenei nofoaga i Matafele o loo ogatasi ma le sini maualuga o le siitia o le faatinoga o auaunaga lautele a le Fuafuaga mo Pulega ma Auaunaga a le Malo 2020-2025 o loo iai le ofisa aemaise le Taiala mo le Lumanai Manuia o Samoa 2021-2026 Vaega Faamuamua 13: Siitia le Atoaga o Galuega Fai a le Malo.
“O le faamoemoe autū na a’e ai le tofa ia te au o le Minisita o le Ofisa Tausi Mavaega, o le Taitaifono ma le Komiti Faatino Tau Tupe Teufaafaigaluega a le Ofisa Tausi Mavaega ma le Tausi Mavaega, ina ia siitia le Ofisa Tausi Mavaega i se tulaga lelei, iloagofie ma faigofie i le mamalu o le atunuu e afifio mai e faatalanoa a latou mataupu tau Mavaega poo Uili.”
Ona o le tele o le mamalu o le atunuu e lē o silafia le tāua o le auaunaga a le Ofisa Tausi Mavaega a le Malo i le atunuu na faailoa ai e Tuala le fuafuaga o lenei auaunaga mo le atunuu.
“O le fai o Mavaega poo Uili, o se vaa e faaofigatā i aai o finagalo ma mafaufau o soo se tagata soifua. Auā a ta’u loa le Mavaega poo le Uili, o lona uiga i le vaai faalemafaufau, ua lata ona oo mai le valaau paia a le Atua. E ui a ina o ni auaunaga e ma’ale’ale, ae o le mau a Afioga Paia a le Atua, o le taulogologo e tupu ai pea le faatuatua.
“O loo i le Ofisa nisi o mataupu ua au tausagā ma ua telē le lavelave ona ua toatele augatupulaga e saofagā i meatotino a sea Esetete.
“O lea ua faafaigaluega e le ofisa Loia ma faatutumu foi nisi o avanoa faigaluega mo tagata agavaa ina ia taumafai e vave ona faama’ape nei esetete ua leva.
“Ia sili ona faamalieina ai o tatou tagata ae ia maua ai foi alagatupe e mafai ai ona gafatia lava e le Ofisa Tausi Mavaega ona faatupe ana ia lava galuega.”
