O lea ua tomua faauluuluga o le ‘au a Samoa mo taaloga o le Pasefika i se aoaoga o le faatinoina o le fesoasoani muamua pe a alia’e mai ni pefea i sui taaalo a le atunuu. 

O lenei aoaoga na afua mai i se fonotaga a faauluuluga a le ‘au Samoa e pei ona ta’ua e le Taitaifono a le Samoa Medical & Anti-Doping Agency Natanya Potoi ona e iai popolega ina ne’i tupu se faalavelave ae lē o iai se tomai e faatino ai. 

“O le aoaoga lenei e faatino uma lava i le ‘au atoa ae o lea ua tatala e faauluuluga o le tatou team Samoa ona faasolo mai lea i faiaoga aemaise sui taaalo.
“O le latou popolega lea na faaleo i fonotaga ua mavae a tupu mai se faalavelave i soo se faamoemoe lava e auai ai ae lē mafai e latou ona faatino le fesoasoani muamua lea ua afua ai ona matou galulue ma le Koluse Mumu o i latou o loo lava le agavaa ma le iloa i lenei vaega.

“E lagona uma lava e tatou le fefe e faatino le fesoasoani muamua pe a faapea e leai se isi o tatou na aoaoina ai o le ala lena o le faia o lenei aoaoga.” 

O nisi o aoaoga o le a agai lea i vaega e pei o le faaaogāina o fualaau ma vailaau faatupu malosi lea e tele ina tapu i soo se tagata taalo ona faaaogāina.

“O loo ua mae’a ona matou taulimaina se fesoasoani tupe mai le Olympic Solidarity e $23,000 Amerika pe tusa lea ma le $50,000 tala Samoa e faagasolo ai aoaoga i mea lava ia tau anti-doping.” 

E faagasolo pea lava nei polokalame ma aoaoga seia oo ina latalata i le taimi e faimalaga ese atu ai le ‘au a le atunuu mo taaloga a le Pasefika i le Atu Solomona i le masina o Novema.