O le faailogaina o le Tutoatasi o Samoa i le tausaga nei 2024, o le a faalauiloa ai ma le tala faakoneseti ua faaigoaina, o le Mau and the Visitor.
O se tala moni i le taimi o pulega a le malo o Niu Sila i Samoa, lea na tagatavaleina ai le Tama Aiga, le Afioga Tupua Tamasese Lealofi III, i le Aso Toonai, 28 o Tesema o le tausaga e 1928.
O lea tala o loo avea ai se tasi o tamalii ae o se alo o Samoa le susuga Pulotu Canada Alofa McCarthy ma faatonu poo le Director.
O ia foi o loo tuufaatasia ma a’oina le tala e pei ona filifilia ai nisi o alo ma fanau a le atunuu i Samoa latou te faatinoina.
O le kamupani telefoni o le Vodafone o loo lagolagoina le faatinoina o le tala faakoneseti, o le a faaali i le fale mataaga i Malifa i le Aso Toonai le aso muamua o Iuni o le tausaga nei 2024.
O le taumafaiga lenei a le susuga Pulotu ua mae’a ona faalauiloa i totonu o Niu Sila ma Ausetalia, ae o le taimi muamua lenei o le a faailoa ai i Samoa, le nofoaga tonu na tagatavaleina ai le Tama Aiga, lea ua silia nei ma le 95 tausaga talu ai.
O se vaega o le alatele autu i le taulaga o Apia le Beach Road, i luma ane o fale o le Malo sa faatino ai pulega faakolone a Niu Sila i Samoa i tausaga ua mavae, na tupu ai le faalavelave ina ua fana atu e se fitafita Niu Sila le fana taavili ma aafia ai le Tama Aiga ma isi tagata o le Mau e toa 11.
Na faaalia i se pepa o faamatalaga mai le susuga Pulotu Canada Tanoai Alofa McCarthy, o se tala e faamomoi loto i soo se tagata Samoa, pe a toe faitau i talafaasolopito o pulega faakolone a Niu Sila ma mea na tutupu ai, e lē gata o le tagatavaleina o le Tama Aiga, ae o le faama’i tele na fano ai le tele o soifua o o tatou tagata.
O Iuni o le tausaga nei e faailoga ai le 62 tausaga talu ona maua lo tatou Malo Tutoatasi, i le mavae o tausaga sa pulea ai lo tatou atunuu e Malo i fafo e pei o Siamani ma Niu Sila.
O se Tutoatasi e lē taumate o le a tulimatai e le toatele o le a fia maua le avanoa e maimoa ma silasila ai i le tala faakoneseti ua faatino e nisi o alo o le atunuu, le Mau and the Visitor.
