O le vaiaso nei e faamae’aina ai le savalia ai e le Ofisa a le Komisi mo le Fuataiina o Tulafono e ala lea i le iloiloina o le tulafono o taavale feoai i auala tetele o Samoa o itumalo i le motu tele i Salafai.

O le masina ua mavae atu nei sa faasalalauina ai e le ofisa e valaaulia ai le mamalu o le atunuu e afifio i nofoaga o le a faatautaia ai lenei faamoemoe.

I se pepa o faamatalaga mai le komisi, o lenei faatalatalanoaga e afua mai ona lē vaaia pea o le faatupulaia o faalavelave tau taavale i luga o ala tetele.

O se suesuega faaletulafono a le Komisi 2019 sa atagia ai le manaomia tele o le toe iloiloina ma le toe fuatai o lenei tulafono e amata mai tulafono o taavale i luga o auala tetele a Samoa.

Na amatalia lenei faamoemoe i Upolu i matagaluega ma faalapotopotoga, o avetaavale o pasi ma taavale la’upasese laiti, o taavale rent ma pisinisi aemaise ai nuu ma afioaga e faaalia ai so latou finagalo i lenei tulafono.

E 3 tulafono autu o loo aiaia ai mataupu tau i taavale feoai i le alatele e aofia ai, tulafono o taavale feoai i alatele 1960, tulafono o suiga tau fela’uaiga i luga o auala 2008 ma tulafono o taavale feoai i le alatele (tupe totogi o faasalaga tau tupe) 2009.

O lenei faamoemoe o loo galulue faatasi ai le Komisi ma nisi o Matagaluega a le Malo e patino i ai lenei tulafono.