E toalima ni alii leoleo sinia o le matagaluega o leoleo a le atunuu o Fiti, ua latou faia i le vaiaso nei se aoaoga i le faaaogaina o uilaafi mo leoleo o le tatou atunuu o loo faaaogaina ia auala o feoaiga i luga o le laueleele.

O se taimi muamua ua malaga mai ai ni leoleo o lea Malo e faia se aoaoga faapea mo o tatou Malu o le Malo. Ua faailoa e le matagaluega o leoleo falepuipui ma le ola toe fuataina, e lima vaiaso o le a faagasolo ai lea aoaoga ma le faamoemoe autu, ia maua ai ni tomai o leoleo o le tatou atunuu o loo faaaogaina uilaafi a o lumanai le taligamalo i le tausaga fou, i le fono a taitai o Malo o le Taupulega.

O le tasi lea o tiute tāua o leoleo i fonotaga tetele faapea o le faafeao lea o taitai o Malo o le a malaga mai, ma o le mataalia i le faatinoina o tiute o le puipuiga o le saogalemu, o le tasi lea o vaega tāua i le aoaoga o loo faatautaia i le taimi nei e alii leoleo mai Fiti.

O le Komesina o le matagaluega le susuga Auapaau Logoitino Filipo, sa ia faafeiloai le aumalaga o leoleo Fiti ina ua taunuu i le amataga o le vaiaso nei, a o lei amatalia le aoaoga.

O le aso muamua o le masina o Aokuso e mae’a ai le aoaoga ma toe taliu ai alii leoleo mai Fiti.

I se tasi o tala mai le matagaluega lava o leoleo o se tamaitai Fiti sa galue i le matagaluega i le vaega o aoaoga faaleoleo le tamaitai o Kasanita Seruvatu, ua toe taliu i lona atunuu i le tuanai o ni tausaga o galue o ia i lea vaega o le matagaluega o leoleo a lo tatou Malo.

O le vaega o aoaoga poo training mo leoleo, e gafa ma le tauaveina o aoaoga e aofia ai ma alii ma tamaitai faatoa ulufale i le faatinoina o galuega faaleoleo.

Sa faamavae atu iai le matagaluega i le faaiuga o le vaiaso ua mavae, a o lei toe taliu i Fiti le tamaitai o Kasanita Seruvatu.