O le faaitu o Asau i le motu i Savaii ua silafia uma e lo tatou atunuu o se nofoaga e ola lelei ai le laau o le moli Saina.
A oo ina tetele le fuata e pei o le tausaga nei ma le tausaga ua mavae, e vaaia i le taulaga i Apia ma nofoaga eseese le samasama faasoloatoa i le tele o lea fua tau faatoaga e faatau ai.
O le fesoasoani tau faatoaga mai le malo o Saina, ua iai nei i totonu ma le atina’eina o laau o le moli, ma ua amata e nisi o tamalii talavou o le afioaga o Vaisala ma Auala i Savaii se taumafaiga ua faato’a ai fanua i toga moli, i le silasila mamao a lelei ona fua mai e le gata o le a faateleina ai lea fua tau faatoaga mo fualaau’aina suamalie e alumia pe a faatau i totonu o Samoa, ae e ono siitia ai i se isi tulaga lelei ma avanoa ona faatau i maketi i fafo, poo le faatu o se pisinisi e gaosi ai le vaiinu suamalie mai fua o le laau o le moli.
O le susuga Tupai Saleimoa Vaai o loo ia atinaeina le koko, ae ua ia auai nei i le fesoasoani a Saina ua ia faato’a ai ni fanua i togamoli saina ma le moli Samoa.
O ia o se tasi sa auai i le vaega lima o le polokalame fesoasoani a Saina, ua maua lona tusipasi ina ua mae’a ni aoaoga sa maua ai tomai mai tagata popoto o saina i le atiinaeina o laau tau faatoaga.
Se faatalanoaga ma le susuga Tupai Saleimoa Vaai.
