O le setete o Niu Sa Uelese lea ua lipotia ua faatetele ai foi le tale vivini, whooping cough ma ua uuna’ia tagata ia faia tuipuipui.
Ua tula’i mai lea tulaga ae o loo aafia foi le setete i le tele o le mau gasegase e aafia ai le mānava, tai pei o le Koviti-19, le influenza, RSV ma le pneumonia o loo pesia ai le to’atele.
I Niu Sa Uelese lava ia ua ta’ua e le 9News e 2,490 gasegase na aafia i le tale vivini i le masina o Iulai ma o se aofa’iga tele lea talu mai le 1991.
I Ausetalia atoa ua faamauina e silia ma le 9,300 tagata ua aafia i le tale vivini i le tausaga nei lava.
O le tale vivini e iloa foi i le isi igoa o le pertussis, o se siama e aafia ai le tagata ma e amata mai i āuga tai pei o le flu, e fiva, tale ma lēlavā ae oo ina faaauau atu ina faatetele le tale e aafia tele ai foi le aumatutua.
Fai mai le lipoti e ono oo atu i le tolu vaiaso e aafia ai le tagata i le tale vivini ma e ono iai foi se lamatiaga i nai fanau pepe aemaise i latou e lei faia ni tuipuipui.
Puna o Faamatalaga: https://www.9news.com.au/national/whooping-cough-outbreak-australia-worst-in-nsw-queensland-calls-for-vaccination-how-to-spot-it/889c221a-86f7-4bd2-8baf-2c3134a22419
