E lei manatu Malele Atofu Paulo o le a faamaonia lona moliaga o le taupulepule e faaoo le maliu e pei ona molia faatasi ai ma Lema’i Faioso Sione lea foi ua faamaonia i le moliaga lava lea e tasi.
Ua faatali nei i laua i se togisala a le faamasinoga ina ua auau tasi faatonu e toalima sa suesueina molimau, e faamaonia lo la moliaga o le tauplepule e faaoo le maliu i le susuga Tuilaepa L Sailele Malielegaoi, sa avea ma Palemia o le tatou atunuu mo le silia i le 20 tausaga.
O le finagalo o Malele Atofu Paulo ina ua mae’a lau le faaiuga i le afiafi po o le Aso Faraile na tea nei.
E lei fia faaalia se finagalo o Lema’i Faioso Sione, ae mo le silafia o le susuga Taualai Leiloa lea na muamua suesueina i le moliaga lava e tasi na molia ai Malele ma Lema’i, na ioe o ia ma o loo tuli nei lona faasalaga e lima tausaga i le falepuipui.
O ia foi o se tasi o molimau a leoleo faasaga ia Malele ma Lema’i sa teena le moliaga.
O Talalelei Pauga o se tagatanuu o Ausetalia o loo molia foi i le moliaga lava lea, e le o iloa se aso e aumai ai i Samoa e tali i le tuuaiga.
O le mafuaaga lea o le tapu a le faamasinoga e le mafai ona faasalalauina molimau sa suesueina a o faagasolo taualumaga o le faamasinoga o i laua ua faamaonia moliaga.
O le aso 24 o le masina fou o Aperila e tuuina atu ai ni lipoti mai le ofisa faanofo vaavaaia ma folasaga a loia mo se faaiuga o se faasalaga o Lema’i Faioso Sione ma Malele Atofu Paulo poo King Faipopo.
