Search

Faatautoga o le Loia Sili fou a Samoa

O le taeao nei na faataunuuina ai se sauniga faapitoa i le maota o le Ao o le Mālō i Vailele e ala lea i le faatautoina o le afioga ia Su’a Hellene Wallwork e avea ma Loia Sili.

O lenei sauniga na molimauina e lana afioga i le Ao o le Mālō Tuimalealiifano Valetoa Sualauvi II ma le Kapeneta.

O le tofia ai o Su’a ona o le faamuta faanatinati ai o le auaunaga a lē sa avea ma Loia Sili le afioga ia Savalenoa Mareva Bentham Annandale ina ua talitonu le tamaitai Palemia ua lē toe faatuatuaina lea sui sinia o le malo e na te faaauauina le tofi Loia Sili.

I le tautoga a Su’a na ia taua ai “Ou te tauto atu i luma o le Atua Silisili ese o le a o’u galue ma le faamaoni ma le alofa ma le lē faaituau i le tofiga ua tofia ai a’u ma o le a o’u faatinoina o’u tiute uma e tusa ma tulafono i le poto ma le malosi atoaatoa ua foaina mai e le Atua ia te a’u e tautua ai Samoa”.

Ua 22 tausaga talu ona galue Su’a o se loia ina ua maea mai ana aoaoga faaloia i le Iunivesite o Aukilani. Na amata ona galue faa-loia i le Ofisa o le Loia Sili o Samoa, ona soso’o ai lea ma le 12 tausaga na galue ai o se loia i tulaga ‘ese’ese i Niu Sila, e aofia ai le Matagaluega o Leoleo ma sa avea foi ma Loia Faufautua Sinia i le Komisi o Fefa’ataua’iga a Niu Sila.

E tele foi ni galuega na ofo fua ai lana tautua i Samoa nei ma sa avea foi Su’a ma Peresetene o le Faalapotopotoga a Loia a Samoa mai le 2017, avea ma Sui Peresetene mo le 3 tausaga, seia oo ina toe tofia e avea ma Peresetene i le masina na te’a nei.

Tala sili ona faitaulia

TALA FOU MAI SAMOA

SAMOA UPDATE

FAATALATALANOAGA

POLOKALAME A LEOLEO

Keep uptodate with Radio Samoa activity & promotion

* indicates required