E to’a 7 sui fou o le Palemene na faataunuuina le latou faatautoga i le taeao nei, o sui ia mai itumalo faapalota lea na faia a latou palota laiti i le masina na tea nei.
Na faia lenei faatuatoga i luma o le afioga i le Fofoga Fetalai Papalii Li’o Taeu Masepa’u ma o i latou nei o sui usufono fou e aofia ai le susuga Maulolo Tavita Amosa o Sagaga No.2, Faleaomavaega Titimaea Tafua o Aleipata Itupa i Lalo, susuga Aiono Tile Gafa o Aana Alofi No.2, susuga Laumatiamanu Ringo Mathew Purcell o Safata No.2, susuga Tagaloatele Pasi Poloa o Sagaga No.4, susuga Maiava Fuimaono Tito Asafo o Falealili No.2 ma le susuga Fuiono Tenina Crichton o Falealupo lea e le’i palotaina lo latou sui tauva.
Ua savali nei ma le 3 vaiaso talu ona maea palota laiti ma o lea ua mafai ona faamautu sui o le Palemene mo ni itumalo e 7. Na amatalia lenei aso fou i se fono tatalo a le Palemene na auai ai ma le Ao Mamalu o le Malo ona sosoo ai lea ma le faatautoga ma amatalia ai loa lea le tauaofiaga mulimuli a le Palemene lona 17 a le atunuu i lenei tausaga.
O se tasi o vaega na faamanino i lenei fono a le palemene o le toe faatulagana o sui usufono o Komiti faapalemene e lima e pei ona fautuaina e le komisi faapalemene mo le faamaonia o le fono aoao. O nei komiti e aofia ai Komiti o Tulafono Tumau mataupu tau Faigapalota, Talosaga ma Tofiga faalefaavae, Komiti o Tupe Maua ma Tupe totogi o le Palemene, Komiti i le Vaega Tau i le Tamaoaiga, Komiti Tau Va Fealoai ma le Komiti o Vaega o Atinae Eseese.
Na ave foi fautuaga ma upu tima’i a le Fofoga Fetalai i sui usufono fou ina ia faia o latou tiute ma tonu ma le faamaoni ma faamanuia ai foi i lo latou tulai mai.
