O le taeao analeila lea ma faatauto ai i luma o le Afioga i le Ao Mamalu o le Malo Tutoatasi o Samoa, Tuimalealiifano Vaaleto’a Sualauvi II Afioga i Minisita e toalua lea ua seei mai i le tofi Minisita.
O i laua nei o le Afioga ia Lautimu’ia Afoa Uelese Vaai o le Minisita o le Matagaluega o Tupe ma le Afioga Laumatiamanu Ringo Matthew Purcell o le a nafa ma le Matagaluega o Taaloga ma Alaga’oa mo le Fiafia o Tagata.
I le sauniga aloaia na faatautaia na saunoa ai le Afioga i le Palemia, Fiame Naomi Mataafa e molimauina ai nei tofiga faale-Malo mo i laua ua faatauto.
“O le faasinomaga a le Afioga Paia a le Atua o ia na te tofia le pule, o ia foi na te faatonutonu folau le pule e tusa ma lona lava finagalo.
“Ou te talitonu o soo se auaunaga e ofoina atu e vaatele ma e taialaina i le Agaga Paia o le Atua.”
O le faamalosiau lea na saunoa ai Fiame e faaaupegaina ai le faiva o le tautua.
“O le agaga lena o lenei taeao i alii Minisita ua faatautoina nei, o le faaopoopoina o le numera o Minisita o le Kapeneta, o le vaai mamao lea i le saga unaia o galuega ma matatia tulituliloa a le tatou Malo.
“O lenei ua tatou tau lalata i le vaeluaga o lenei paeaiga faa-Palemene, o le agaga maualuga o lo tatou Malo ia saga matimati faatinoga uma ma ia mapo le auaunaga ma la tatou tautua.
“O le fatu foi lea o le tautoga o le loto faamaoni a tatou nei o taitai na tofia mai e le atunuu e fuafua, faafoe, faatino le tulituliloa o galuega mo le manuia au i luma o Samoa.”
Na faailoa e Fiame o tofiga faapenei e le o ni tofiga faigofie.
“E alu atu uma iai le mamafa o galuega faale-Malo, o lelei ma mea faaletonu e muamua ona afe mai iai tatou o Minisita o loo fitoitonu iai.
“O aga masani ia o auaunaga faa-Minisita e pei foi ona luitau ai soo se tofiga faataitai.”
Na faamalosiau ai le Palemia i sui Minisita fou ina ia tepa la laua silasila i le Atua pe a oo ina lutia le auaunaga.
“E leai se poto e leai foi se atamai na te mafaia aso faigata ua na o le tautai Sili o ia o le Atua fai vavega.”
Na faatumulia lenei sauniga i sui o le Malo o Matagaluega aemaise uo ma aiga na molimauina lenei faamoemoe.
