Faatautō le uluai Palemia tamaitai o Samoa

O le afioga ia Fiame Naomi Mataafa o le uluai Palemia tamaitai lea o 
Samoa lea na faatautoina i le po anapo i fafo ane o le falefono i totonu 
o se faleie ina ua le mafai ona agai totonu o le maota fono.

O lenei faatautoga na faia i le malae o le faautugatagi, le malae o 
Tiafau i Mulinuu.

O lenei faamoemoe na molimauina e sui faipule filifilia a le Faatuatua i 
le Atua Samoa ua Tasi faatasi ai ma a latou sui lagolago.

O se aso uiga ese lea i le tala faasolopito o Samoa ma ua moliamuina foi 
e ofisa faasalalau i le lalolagi.

Taua e Fiame i se faatalatalanoaga ma ofisa faasalalau ina ua maea le 
faatautoga “ o loo iai auala talafegai ma le faatulafonoina lea na uia e 
le FAST e faatautaia ai le faatautoga ina ua taofia uma isi auala ma o 
lea gaioiga ua taua o le Doctrine of Necessity”

E pei ona silafia o le aso ananafi na atoa iai le 45 aso talu ona maea 
le faigapalota a le atunuu lea na faia i le Aso 9 o Aperila.

I le Aso 21 o Me na poloai ai le Ao o le Malo ina ia tauaofia le 
Palemene i le aso gafua 24 o Me peitai i le afiafi o le Aso 22 o me na 
toe tuu mai ai se faasalalauga mai le Ao o le Malo e faaleaogain ai le 
tauaofia o le palemene.

O lea faaiuga na ala ai ona toe faia le faamasinoga i le Aso Sa 23 o Me 
e fesiligia ai e le FAST le solifaavae o le poloaiga a le Ao o le Malo 
ina ia lē taunuu ai le tauaofiaga o le Palemene i le Aso Gafua. Mulimuli 
ane tuu mai le iuga a le faamasinoga i le Aso Sa e faaleaogaina ai le 
taofia lea o le tauaofiaga o le Palemene.

Peitai i le taeao o le Aso Gafua 24 o Me e taunuu atu sui o le FAST ua 
loka faitotoa o le maota fono a Samoa.

O le finau a Fiame “o gaioiga uma a le FAST na faatino i le aso ananafi 
ina ua le mafai lava ona tatala le Falefono o vaega uma faatulafonoina 
ma o loo savalia lava auala o le faaletulafono ina ia faataunuu vaega e 
tatau ona fai e pei o le faatautoina lea o sui faipule ma se malo fou o 
Samoa i totonu o le 45 aso talu ona maea le faigapalota.”

LAUILOA

Keep uptodate with Radio Samoa activity & promotion

* indicates required