Ua taumafai nei le Matagaluega o Faatoaga ma Faigafaiva e faatāua taumafa poo meaai o loo maua i o tatou lotoifale ma o loo mafai foi ona gaosia pe gasese lava i Samoa.
Ua faailoa lautele e le Ofisa Sili o pulega o lea matagaluega a le Malo le susuga Dr Seuseu Tauati, o lea taumafaiga ua tuuina atu ai le lagolago i le aufaifaatoaga ma le aufaifaiva a le atunuu e faaaogā ai fua o a latou faatoaga ma taumafa mai le gataifale mo sauniga eseese ma taligamalo a le Matagaluega o Faatoaga ma Faigafaiva.
E mautinoa i lea taumafaiga o se fesoasoani lelei mo le ave o le faamuamua ia tatou lava taumafa o loo maua i o tatou laufanua ma le gataifale.
O taumafa ua lisi mai e le matagaluega e ao ona tapena iai nisi o le a latou maua se galuega e saunia ai taumafa mo meafai ma taligamalo a lea matagaluega, o vaisalo, koko esi ma le supo esi, sanuisi e ave iai avoka, o le ipu vaivevela e ave iai le moegalō poo le laumoli, koko samoa ma le kofe o loo totō ma ola i lo tatou atunuu.
Ua unaia ai foi le faaaogā o a tatou lava fualaau’aina suamalie e pei o esi, mago, vineka, kuava ma le anoano o fualaau’aina suamalie o loo ola lauusiusi i o tatou laufanua.
Ua na o se vaega lea o taumafa ua faailoa atu ae tele isi taumafa o loo gaosia lava i le atunuu o loo fautuaina e lea matagaluega e tatau ona saunia mo a latou taligamalo.
