O le manulauti lea o le fonotaga o loo faagasolo i Nadi Fiti e faatāua ai le leo o tina faifaatoaga e faaali ai mataupu e faaleleia ai faatoaga e aunoa ma le faaaogā o vailaau ma fetalaisa.
O lenei fonotaga o loo taimua ai se faalapotopotoga ua ta’ua o le Pacific Organic & Ethical Trade Community.
O se tasi o tamaitai faifaatoaga ua loa tausaga o galue i lona lava fanua ma se tasi o faipisinisi i le atunuu Floris Niu o le kamupani o le Ms Sunshine Organic Farms lea o loo faatauina atu le koko i pisinisi i Niu Sila ma fuafua mo Ausetalia e tusa ai o lona auai ai i lenei fonotaga.
O le faalapotopotoga lea o le POETcom o loo feagai ma le faalauiloaina ma faatulafonoina le faiga o faatoaga ma le tausiaina o fanua faalenatura e aunoa ma se faaaogaina o vailaau poo fetalaisa.
“O le autu o lenei fono i Fiti, o le tuufaatasia mai lea o nisi o tina ma tamaitai faifaatoaga, mai atunuu ma motu o le Pasefika, e faatalatalanoaina ma faatāuaina le auai o se leo o tina ma tamaitai i totonu o faalapotootoga faapenei.
“O le faafoeina o lenei vaega e fesoasoani ai i le toatele o tamaitai faifaatoaga, ma isi o loo faia galuega eseese i totonu lava o le Organic Value Chain.
“O ni mataupu faatāuaina i le fono o le faaaogaina lea o le Leo ma le tomai o tina i lenei matagaluega.
“E pei lava o tina e sili atu ona tāua ia i latou le tausiina o fanua ma eleele faalenatura ona o le tausiga o le soifua maloloina ma le vaai mamao i le soifua manuia o fanau ma aiga, aemaise le lumanai manuia o taumafa ma le siosiomaga.”
Na ta’ua e Niu tulaga o loo atina’e ai lona lava laufanua.
“I totonu o lo’u lava nuu i Samoa, ua leva ona ou galue malosi e faatāua ma tausi lo’u fanua ma le siosiomaga i auala faalenatura poo auala sa faaaogaina e o’u tuaa ua mavae atu.”
Na ia faasoa foi i faafitauli i le taumafaiga mai o lana faatoaga.
“E ui ina faasā le vailaau, lapisi e lē pala, ma isi lava metotia faaneionapo, i totonu o lo’u fanua ma faatoaga, ae iai lava faafitauli faaletuaoi sa ou aafia ai talu ona ou toe foi i Samoa i le tausaga 2014.
“Sa faapea ona ou sailia ai se fesoasoani mai fafo.
“O le tamaitai o Karen Mapusua, sa amatalia le POETCom ma o ia foi sa galue malosi i le faatāuaina o le Organic Movement i Samoa.
“Sa ia tusitusi mai e fai ma faamalosiau ia te au i le amataga o la’u taumafaiga o la’u faatoaga.
“E tele tausaga sa lē amanaia ai a’u e isi alii faifaatoaga, ma sa iai taimi ou te faavaivai ai ona o faitioga ma amioga lē talafeagai sa latou faia e taumafai e tuli ese ai a’u ma fanua o le matou aiga.
“Sa oo lava i le omai ma faga vailaau i lo’u fanua, faaleaga a’u meatotō, taufaamata’u, ma gaoi fua o la’u faatoaga.
“Ae ui i lea, sa tuu atu lava i le Atua talosaga e puipui mai a’u, ma faamagalo i ē ua amio leaga mai.”
O mataupu faapenei sa faatalatalanoaina i lenei fono e pei ona faaalia e Niu.
“O vaega ia sa folasia i le fonotaga lenei, pe faapefea ona fai se suiga lelei, i totonu o aiga, nuu ma alalafaga, e puipui mai ai tina ma tamaitai o loo galulue i o latou faatoaga ma totonu lava o le Organic Value Chain.
“O nisi foi o vaega o le sailia lea o ni auala e mafai ai ona galulue faatasi ma alii faifaatoaga.”
