O lenei aoaoaga ua agai lea mo faiaoga o le autaaalo ma nisi o vaega e aofia i taaloga mo i latou o loo iai aafiaga tumau i le tino.
Na tatalaina aloaia ai e le Minisita o Aoga Taaloga ma Aganuu Afioga Seuula Ioane Tuuau.
“O lenei polokalame o loo atagia ai se alafua o atina’e a le atunuu 2021-2025 i se tasi o vaega o loo faailo mai ai le agai lea i le manuia lautele o tagata.
“Ua talafeauga ma le faamoemoe o le aso o le unaia o tagata uma e auai i lenei aoaoga ua le na o i latou o iai aafiaga tumau o le tino ae ua aofia uma ai ma soo se tagata o loo iai le sao i le atina’e o taaloga.
“O le atina’e ai o taaloga o loo ua mafai ona faalauiloa i totonu o aoga ma afioaga i Upolu ma Savaii.”
O se aoaoga muamua lea talu mai le 2015 na faatino ai mo taaloga a i latou e iai aafiaga tumau o le tino ma o loo mafai e i latou nei ona tauva ai i taamilosaga faavaomalo e aofia ai Taaloga o le Pasefika, Taaloga a Malo o le Taupulega ma le Olimipeka.
O lenei la aoaoga o loo mafai ona faatautaia e ala i le lagolago mai a le Iunivesite a Griffith mai Ausetalia, Ocean Paralympics Committee faatasi ai ma le Asosi o Taaloga a Samoa.
E lua aso o le a faatautaia ai lenei aoaoga ma le faamoemoe ia tele se sao mo le atina’e e unaia taaloga i le atunuu.
