Ua sau le valaau i faiaoga o aoga tulagalua e taofi uma tetee o loo faia nei, a o agai ai e faaauau feutanaiga e ono saofai ai se isi ese e ta’ua o le third party ma e tutoatasi.
O le Aso Toonai na faamautinoa mai ai e le sui o le asosi o faiaoga o lea ua agai faiaoga e iloilo talosaga e lua ua tuuina mai e le Employment Relations Authority e tusa ma fonotaga i le vaiaso talu ai, muamua o le taofi lē tumau o tetee o loo faia auaua’i i le taimi nei, faapea ai ma le amata talanoa ae o le a saofai ai ma le sui tutoatasi.
E uma le faaiuga o le vaiaso e lei maua se tonu mai faiaoga, ae pau o lea o le a fono vave ma faia se faaiuga e faatatau i talosaga ua tuuina mai.
E oo mai i le taeao nei o loo tumau lava le tala mai faiaoga e faaauau pea tetee a o agai ai e fono.
Ae mai le matagaluega o aoga, o loo malie atoatoa i manatu e lua ua aumai e le Employment Relations Authority ma ua talitonu foi o le saofai ai o le sui tutoatasi i totonu o feutanaiga o loo faia nei o le a fesoasoani lea i le sailiga o se tali o le faafitauli.
