Ua faatalia nei le aso e taunuu ai le fomai e faia taotoga faapitoa mai Fiti, ona faatino lea o le taotoga faapitoa i le tino maliu o le tina matua 78 tausaga lea na fano le soifua i le faalavelave ua molia ai se tamaitai e iai ona tomai faatusitala ma solo fatu, le susuga Papalii Sia Figiel lea o loo nofo taofia pea i le vaaiga a leoleo.

Ua lipotia se finagalo o le Komesina o leoleo ua ia faailoa ai, o le fautuaga a le pule o maliu le coroner ia faia se taotoga faapitoa e sailia ai le mafuaaga o le maliu.

E lē mafai foi ona tuuina atu i aiga o le tina ua maliu mo toe sauniga, seia vagana ua mae’a suesuega faafomai o loo tālia.

O le vaiaso asau o le a tulai ai i le Faamasinoga Maualuga lē ua molia ona o le maliu o le tina 78 tausaga o se Polofesa sa avea ma faiaoga poo se lecturer i le Iunivesite o Manoa i Hawaii.

O se samala ma se naifi laititi ua taofia e leoleo mo suesuega atili ona ua masalomia o ni aupega na faaaogā e lē ua molia i le solitulafono o le fasioti tagata faamoemoeina.