O Me o le tausaga na tea nei na taofia ai le toe ave o se laisene e gaosia ai le fagu malosi o le Niu Vodka i le pisinisi a le susuga John Rankin, o se tamalii o ona mātua sa faagaioia le Island Style sa gaosia ituaiga o uaina eseese i tausaga ua mavae.
O se tasi lea o pisinisi na taofia le toe gaosia o meainu malolosi ina ua faatino e le komiti e pulea le avamalosi se taumafaiga e saili ai le maualuga o le sipili poo le avamalosi le alcohol o loo ave i fagu malosi sa gaosia i le atunu.
O se faiga na taofia uma ai ma pisinisi a Saina sa gaosia fagumalosi lea o loo taofia pea i le taimi nei.
I se feiloaiga ma le susuga John Rankin i le nofoaga o lana pisinisi i Vaitele uta, sa ia faailoa mai ai pepa o fetusiaiga ma le nofoaga o suesuega faasaienisi ma le matagaluega o le soifua maloloina, o loo faailoa ai le saogalemu o le gaosia o le avamalosi a lana kamupani.
Peitai o loo fesiligia e lea tamalii le mafuaaga ua toso umi ai e le komiti o le avamalosi le toe tuuina atu o lona laisene.
Sa maua se fesootaiga i le Sui Palemia o le taitaifono o le komiti o le avamalosi le afioga Tuala Tevaga Iosefo Ponifasio, ma ia faailoa ai o loo faagasolo se tasi o taumafaiga o le faalaugatasia uma lea o pisinisi gaosi avamalosi i se faiga e tutusa uma ai auala e gaosia ai ia meainu malosi.
O se taumafaiga na ia faaalia o loo galulue ai se soa komiti, ma e tatau ona mae’a poo le vaiaso fou.
Ua ia fautuaina foi le faipisinisi sa gaosia le Niu Vodka ia lava pea le onosai ae o se taimi ona maua lea o se la feiloaiga, e faamanino ai nisi o vaega o loo mafua ai ona tuai ona toe maua lona laisene e gaosia ai le Niu Vodka.
