O le aveesea o le tofi minisita lagolago o le sui faipule o le itumalo faapalota o Salega Muamua, ua tālia ai e le itumalo se finagalo o le Fofoga Fetalai, aemaise o se finagalo o le Malo pe afai e faatino se suesuega i le mataupu ua tuuaia ai le sui faipule, le afioga Fepuleai Faasavalu Faimata Su’a.
O le Aso Lua ua mavae na fono ai le itumalo palota o loo aofia ai Si’uvao, Fagafau, Samata i Tai ma Samata i Uta, o afioaga o Faiaai ma Fagafau, e talanoaina le mataupu ua salalau ai ni tala i luga o le api o foliga ona o le faamuta o le tofi minisita lagolago o le latou sui faipule.
I se feiloaiga na maua i se tasi o matai o le itumalo le tofa Tuisalega Seleni Farani na ia faailoa ai o le fono foi lea na maua ai le finagalo autasi o le itumalo o Salega Tasi e faatumau le latou lagolago i lo latou sui faipule, a o tālia ai se isi faaiuga e taunuu iai se suesuega.
Le tofa Tuisalega Seleni Farani, o se matai o le itumalo palota o Salega Muamua.
