O le faafoeina ai o faatalatalanoaga o loo taimua ai le Komisi o Auaunaga a le Malo o Samoa ma ana paaga auā le fausia o se faiga faavae mo faiga faaalatua.

I pepa o faamatalaga ua lipotia ai le iai o leo mai vaega eseese i le atunuu e aofia ai paaga mai vaega tuma’oti ma totonu o le Malo, sosaiete, faalapotopotoga o tina ma tupulaga talavou o vaega faapalemene aemaise le vasega o tusitala ma faasalalau e pei ona faatulagaina ai vaiaso e tolu ua mavae atu.

O nei fuafuaga uma ina ia faapupula lea manulauti a le Malo e ala i ana auaunaga o loo agiagia ai faigamalo lelei ma le sa’o, o itu ia na mafuli iai faatalatalanoaga e pei ona laualuga ai le sao o Samoa ma nisi o vaega o auaunaga a Malo Aufaatasi ma le Malo o Niu Sila.

O le atina’e ai o lenei faiga faavae o se tautinoga lea a le Malo o Samoa e pei ona faailoa i le fuafuaga o ana atina’e.

Na saunoa le Sui o le Faalapotopotoga o Atina’e a Malo Aufaatasi i Samoa nei, John Sorensen e tusa ai o lenei faamoemoe.

“O faiga faaalatua ma faiga piopio o se faafitauli lavelave lea e manaomia ai ni auala faapitoa, ma e lē gata i le manaoga ma le naunau e foia ai.

“E manaomia le galulue felagolagomai e faataatia ai tulaga uma e moomia mo puipuiga ma auala e foia ai.”

O loo iai nei se taiala ua mae’a fausia e Malo Aufaatasi o loo taumafai ai lenei faafitauli ina ia foia vave i totonu o faigamalo ma o le avea ai o Samoa o se sui auai i lenei taiala i le 2018 o se itu tāua lea ua laaasia ina ia tulaga lelei uma le faatinoina o tiute ma nafa o le Malo ua tofia ai.