Ua amata faatalanoa nei e le auaunaga a atunuu o le Pasefika o loo feagai ma feutanaiga tau fefaatauaiga i le va o atunuu laiti ma atunuu malolosi o Niu Sila ma Ausetalia lea e ta’ua o le PacerPlus, le mataupu i faamanuiaga o le superannuation poo le supa o loo iloa tele ai, mo tagata Pasefika o loo galulue faavaitaimi i Niu Sila ma Ausetalia.

O se faamanuiaga o loo agavaa iai tagata Pasefika e pei o Samoa o loo galulue i Ausetalia i le polokalame o galuega faavaitaimi i va masina ma le polokalame 3 tausaga e pei o le au fasi manu.

Faaalia e le faauluuluga o le iuni muamua a tagata faigaluega i Samoa o loo feagai ma le faia o fesoasoani mo le maua o ia faamanuiaga tau tupe mai Ausetalia, o se faamanuiaga e tatau ona maua foi e tagata faigaluega faavaitaimi i Niu Sila, auā e lelei tele seleni o loo maua ai e o tatou tagata o loo galulue i Ausetalia.

O Seveaoga Saina Setu Tomi, sa auai i se fono na usuia i Fiti ia Iulai sa lāgā ai lenei mataupu.

Le faletua o Seveaoga Saina Setu Tomi, o le faauluuluga o le ofisa o le Iuni muamua a tagata faigaluega i lo tatou atunuu le Samoa First Union.

O le Aso Lua o le vaiaso nei na amata faatalanoa ai e le PacerPlus ma sui o atunuu o le Pasefika o loo aofia i le polokalame o galuega faavaitaimi, ni auala e saga faaleleia ai le maua o faamanuiaga tupe o le supa mo tagata galulue faavaitaimi i Ausetalia, ae silasila ai foi Niu Sila i se auala e agavaa ai tagata faigaluega faavaitaimi i lea faamanuiaga.