E silia ma le 160 fale faigaluega ua ta’ua o accredited employers o lea ua faasagasaga iai suesuega a le Immigration a Niu Sila e tusa ma faitioga o le faapologa o tagata faigaluega ma soli maliega o o latou visa faigaluega na omai ai.
O lea ua toe alia’e le toatele o tagata faigaluega na omai i visa faigaluega ma le faamoemoe e oo mai i Niu Sila faigaluega, peitai e lē o le tulaga lena o iai, ma o le toatele o i latou nei o tagata Initia.
E oo mai i le aso 9 o le masina lenei, ua faamalolo lē tumau fale faigaluega e 5 ae 6 fale faigaluega ua se’ia laisene ma e mafua lava i faiga faasolitulafono ua soli ai maliega o galuega, sese tautinoga na faailoa agai i le Immigration atoa ai ma le faafaigaluega o nisi e aunoa ma ni visa faigaluega.
I lipoti a le Herald ua toe molimau ai le peresetene o le The Supreme Sikh Society of NZ, e tusa ma le toasefulu tagata faigaluega e sulu atu i le latou malumalu i vaiaso taitasi.
Ua tuuaia ai e nisi le faiga fou o le visa lea na tatala e le malo i le masina o Iulai i le tausaga talu ai, le Accredited Employer Work Visa lea ua silia ma le 77,000 accredited employer work visas ua talia.
A o fai mai ai le Immigration ua tele faitioga ua faaoo atu e aofia ai ma le visa lenei e mafai e fale faigaluega ua faalaiseneina e le Immigration ona aumai tagata faigaluega, ae e lē o manao le minisita o le Immigration, Andrew Little e faia se iloiloga.
