O le komisi o galuega a le Malo o se tasi lea o itutino tāua ua avea nei ma se tasi o maatulimanu i taumafaiga o loo faagasolo i le tapenaina o se faiga faavae muamua o le a faatūina ai se itutino e mataituina faiga faaalatua ma gaioiga e lē fetaui ma talafeagai ma taiala o pulega lelei, poo se Anti-corruption policy.

O le faatinoina e le komisi o galuega a le Malo i le vaiaso na tea nei o se faatalatalanoaga ma itutino e iai o latou faiā i le tapenaina o sea faiga faavae tāua, ua faaalia i se pepa o faamatalaga o se laasaga e tāua tele.

O nisi o itutino ua oo iai lenei faatalanoaga o le aufaasalalau poo le media, faalapotopotoga tuma’oti, o mafutaga a tupulaga talavou faapea faalapotopotoga a tina ma tamaitai.

O le faatuina o se itutino e mataituina faiga faaalatua ma gaoioiga e lē fetaui ma taiala o pulega lelei, o se tasi o manulauti o faiga faavae a le Malo i le faamoemoe e una’ia ai faiga amiotonu e siitia maualuga ai le tulaga faatuatuaina o pulega.

O se tasi foi lea o fuafuaga taulai o le atina’e o Samoa o loo maioio i totonu o fuafuaga alualu mamao o le atina’e o le atunuu mo le tausaga 2020 i le 2021 ma le agai atu i le tausaga 2025.

O le talia e Samoa o le avea ma sui o le feagaiga faavaomalo a Malo Aufaatasi e tetee atu ai i faiga faaalatua ma gaoioiga faapiopio i le tausaga e 2018, o se tasi lea o matati’a ua faamauina ai Samoa i le va nonofo ai ma isi Malo o le lalolagi o loo avea ma sui o Malo Aufaatasi.