E toatasi le tagata na laveaiina mai i le mu o se fale i Aukilani i le taeao analeila ma ua faailoa mai o le fale e i le faaitu o Albany i North Shore e fogafale lua ma ua faamatala mai i lipoti e toatasi le tagata sa poloka ai i totonu o le fale i le taimi a o sasao ane le afi.
A o lei tāina le ono i le taeao analeila na tupu ai le faalavelave lea ma taunuu atu loa iai le vaega o le tineimu ma laveai lē sa i totonu o le fale.
Na aveina atu lea tagata i le falema’i mo togafitiga ma ua faailoa e le fesoasoani faavavave e taunuu atu ua malosi le sasao a le afi i le fale peitai ua mae’a ona tapēina i le taimi nei.
O loo iai pea nisi o le aufaigaluega i lea nofoaga e faamautinoa o loo saogalemu ma faia foi suesuega i le mafuaaga o lenei faalavelave.
O le lua ai lea o fale i Aukilani ua faatama’ia i le afi i totonu o aso e lua ma o loo suesue uma ia mataupu.
