Ua iai suiga faaopoopo ua polomisi mai ai le malo faasaga i solitulafono o loo taulamua ai tupulaga talavou.
O le mae’a ai o le fono a le Kapeneta ananafi na faailoa mai ai e le Palemia Chris Hipkins o se tasi o ia suiga o le faapipii lea iai o se isi faaopoopoga e faasala ai tagata matutua o loo faaaogaina talavou e solia le tulafono.
O se teuteuga e ono nofosala ai le tagata matua i le falepuipui i le oo atu i le 10 tausaga.
O le suiga foi lenei na toe sui mulimuli ane pe ā ma le itula ma le ‘afa faamatalaga mai le ofisa o le Palemia ananafi, ma fai mai ai e le o se faaopoopoga fou ua faia e le malo, peitai o faiga nei o loo unaia ai e tagata matutua tupulaga talavou e soli le tulafono.
Ua fai mai ai ma nisi o tuuaiga, o se suiga faatatope ma o se luma i le malo le sese o faaupuga na muai fai mai ai.
O soligatulafono nei o loo patino iai le suiga lenei o osofaiga a gaoi o loo toe faaaogā ai taavale, poo gaoi nei o loo tele ina faia e tupulaga talavou laiti.
O loo tumau lava tuuaiga a le National, e le mamafa i le malo solitulafono nei ua tigaina ai tagata aemaise lava pisinisi.
I faamaumauga o lea na faaluaina i le 2022 osofaiga nei e aafia ai faleoloa pe a faatusa i le 2018, peitai a o alu i luga soligatulafono, i le faatusatusaga o le aofai o tagata molia o loo maitauina ai le sau i lalo e tusa ma le 8%.
