Ua faasā mai e le matagaluega o Pisinisi, le Ministry of Business, Innovation and Employment, tagata faigaluega mai le toe faaaogaina o se faiga faatekonolosi e igoa o le ChatGPT.
E faapea se faamatalaga mai le leitio faavaomalo a Niu Sila o lea faiga o loo iai lamatiaga i tulaga tau faamatalaga faalilolilo.
Ua ta’ua i le lipoti e faapea foi se faiga ua faia i atunuu i fafo e kamupani ma faletupe tetele e aofia ai le Apple ma le Samsung.
O iai faamaumauga ua faailoa ai o le masina o Mati na poloka ai e le matagaluega le aufaigaluega mai le toe faaaogaina o le ituaiga polokalame lea ma le AI tools.
O popolega o le matagaluega ina ne’i tuuina e le aufaigaluega ni faamatalaga ma’ale’ale i totonu o ia fesootaiga ma ono toe alia’e mulimuli ane.
Fai mai o loo taofia la le toe faaaogaina mo le taimi nei a o suesue e le matagaluega le mataupu.
E ioeina foi e se tasi o faiaoga sinia i mataupu tau le tulafono i le iunivesite o Aukilani o Nikki Chamberlain lenei faaiuga.
Fai mai a ia o nei polokalame o ni faiga faatekonolosi fou ma e lē mailoa ni ona aafiaga ma e leai foi ni tulafono patino a Niu Sila e faatatau i ituaiga polokalame ia.
Na faailoa e le komesina o tulaga faalilolilo Privacy Commissioner, Michael Webster o le tulaga o loo iai o loo tuu i le faitalia a le ofisa o le malo ma kamupani pe latou te faaaogaina le ituaiga lea ua ta’ua o le AI poo le Artificial Intelligence.
