Search

Faapupula le feau o le saogalemu o le atunuu mai le faama’i o le Aids

O le aso muamua o le masina lenei o Tesema i tausaga taitasi e faamanatu ai e le lalolagi atoa mo le aso e faamanatu ai le faama’i o le AIDS ma lona vairusi o le HIV ma o le faalapotopotoga o le asosi o faafafine ma faatama i le atunuu i Samoa o loo taulamua i lenei faamoemoe.

Na faatino ai se sauniga i le vaveao o le taeao nei i le Malumalu Metotisi i Matafele i le tapēina lea o moli ae faaola moliga’o o le faailoga masani mo le faamanatuina ai o lenei aso faamanatu.

Na saunoa ai le Minisita o le Soifua Maloloina, Afioga Valasi Luapitofanua Tafito Selesele e aloaia ai le tomua ai o lenei sauniga i le polokalame a le asosi lenei mo le vaiaso atoa.

“E lē mafai ona faagaloina lenei aso o se aso e tomanatu ai i le fememeai ai o le lalolagi i le vaitaimi o le 1970-1980 lea foi na afaina ai nisi o tagata o le atunuu i le vaitaimi o le 1980-2000.

“Ae le galo ai e le faalapotopotoga lenei o faafafine le faasinosinomia ai o i latou i tuuaiga e faapea o latou tonu lava nei ua mafua ai lenei faama’i.

“Aemaise ai o lenei faama’i na pei e sosolo ma pepesi ona o feusuaiga e le puipuia, ua ulagia ma pei ua inosia ai lenei itupa o faafafine i lena vaitaimi e ala i tusitusiga i luga o nusipepa ma tala faasalalau i luga o leitio.

“O le viapanoa lenei na mafai ai loa ona faapunafanau le agaga lea sa faaigoaina ai loa faafafine o le mala, ua moni ai le muagagana, “E a le uga e tausili, ae tigaina ai le atigi.”

O lenei faama’i e pei ona talatala ai e le Minisita o le popolega lea i le toatele ona o vaitaimi e lei maua ai se fofo.

“O le ala lena na faaigoaina ai loa o le faama’i oti ona o le tulaga o le leai o se togafitiga mo lenei faama’i.

“I le faamanatuina ai o lenei aso faapitoa i le lalolagi ua iai le anavatau e taitaiina ai tapenaga ua faaigoaina ia taimua tagata uma.”

Ae peitai o le amata pepesi ai o lenei faama’i i tausaga ua mavae sa faaitno ai le pitolaau a le Soifua Maloloina auā le puipuia o le atunuu.

“I le pepesi ai la o lenei faama’i i le tausaga e 1980 sa mausali ma mataitu pea tapenaga a le Matagaluega o le Soifua Maloloina i ana galuega faatino, vaega muamua sa amata ai loa ona tapisa auala e taofia ai le sosolo faaafi o lenei faama’i i Samoa nei.

“O se luitau mo le Matagaluega ona e fai sina maaleale o lona talanoaina auā o se faama’i e pipisi i feusuaiga lē puipuia.”

O le faalapotopotoga a faafafine i na vaitaimi e pei ona faailoa ai e le Minisita sa faaaogāina ai agamālie e fesootai ma tapisa ai le feau faailoa e puipuia ai Samoa mai lona aafiaga.

“O iina na muai taulamua mai ai le asosi lenei ma le latou galuega faifaatasi ma le Soifua Maloloina e faatino fautuaga ma lapataiga lautele mo puipuiga.”

O le faamanatuina o le aso mo lenei faama’i i le atunuu o le faatomuaga lea o le polokalame o loo faagasolo a le faalapotopotoga o le asosi a faafafine ma faatama e faatāuaina ai lo latou sao i soo se vaipanoa o atinae i le atunuu.

Tala sili ona faitaulia

SAMOA UPDATE

TALA FOU MAI SAMOA

Keep uptodate with Radio Samoa activity & promotion

* indicates required