Ua mae’a lau le faaiuga a le faamasinoga faaitumalo i le moliaga o le taumafai e faatino se faaoolima i se isi tagata, sa molia ai se matai o le afioaga o Malie, le afioga Maualaivao Pepe Seiuli, ma ua talia lana talosaga na finauina e lana loia, ma ua faapafala se faasalaga e aunoa ma le faamaonia o se moliaga.
Na faia e leoleo le moliaga ona o le tagi a se isi matai o lea lava afioaga le afioga Maualaivao Patelesio Ah Him, e mafua i se feteenaiga i le fono a le nuu sa talanoaina ai sui faatutū o le palota tele ua mavae.
Na suesueina mau a leoleo ma faamaonia ai le moliaga o le taumafai e faatino se faaoolima.
O loo taoto i le faamasinoga se isi mataupu tau faamasinoga a le afioga Maualaivao Patelesio, o loo ia su ai nisi o matagaluega a le Malo, e pei o lē sa avea ma komesina o leoleo, o lē sa avea ma Palemia ma lē sa avea ma Loia Sili a le malo.
E fesootai lea mataupu tau faamasinoga ma se tagi a Maualaivao Patelesio na faaulu i leoleo faasaga foi i le tamalii ua talia lana talosaga ua faapafala ai se faasalaga e aunoa ma le faamaonia o se solitulafono, ae e lei taunuu ona oo ia mataupu i le faamasinoga.
