O loo faasolo pea galuega faatino a le auaunaga o le Soifua Mālōlōina, i le tau taofia o le pepesi atu o le faama’i o le misela; i le māua ai o nisi o le atunuu ua aafia i totonu o Niu Sila.
I faamaumauga ma lipoti lata mai o loo faaopoopo pea numera o tagata ua faamauina ua aafia i le misela, e pei ua oo atu nei i le to’a sefulu ma le fitu (17) i latou ua maua i le faama’i.
Faamauina o ē ua aafia e mai Northland, Aukilani, Taranaki, Ueligitone, ma Nelson.
Ta’ua e le Health NZ o le ma’i na maua lata mai nei o se tasi e mai i Aukilani ma o sē na fesoota’ i atu i sē ua maua i le faama’i na aafia mai i atunuu i fafo.
I le oo mai ai o lenei faama’i i totonu o le atunuu, o lea ua faailo e le Minisita o le Soifua Mālōlōina, Simeon Brown e oo atu i le 117,000 vailaau mo tuipuipui poo MMR vaccine doses ua i le auaunaga mo le galuega i le faia ai o tuipuipui, ma e ta’ua e 28,000 nisi vailaau o le a maua mai le masina fou.
Ua faaalia e le auaunaga o le Pharmac le maualuga ma le tele o tuipuipui o loo moomia i Ueligitone, Aukilani, Kalaiesitete, Dunedin, ma Whangārei.
Faamanino mai e le foma’i, Dr Oz Mansoor (Tairāwhiti) e silia ma le 500,000 tagatānuu o Aotearoa ua i tulaga ma’ale’ale talu ai le maualalo tele o le numera o ē e le’i faia ni tuipuipui.
Ua fautuaina malosi e le Soifua Mālōlōina tagata uma ina ia māta’itūina lelei tulaga o a latou tuipuipui.
E silasila toto’a po ua moomia le faatino ai o nei tuipuipui ina ia mautinoa le malupuipuia o le to’atele mai le ono aafia.
Ua fautuaina foi tagata e faafesoota’i le Helpline (0800 28 29 26) mo le siakiina o tulaga o a latou tuipuipui.
Puna o Faamatalaga: https://www.rnz.co.nz/news/national/577564/measles-case-total-rises-to-17-as-another-found-in-auckland-health-nz
