O le amataga o le vaiaso nei na auina faanatinati atu ai i Niu Sila le siiga gasegase a le afioga i le Minisita o le matagaluega o pisinisi alamanuia ma leipa, le tofa Leatinuu Wayne Sooialo, ona e manaomia vave ni togafitiga i lona fatu.

O loo faailoa i se pepa o faaiuga faapitoa a le kapeneta le faia o le faaiuga i se tulaga vave na auina atu ai le minisita i se vaalele e faaaoga i le aveina o gasegase e tuga auga mo togafitiga i fafo.

O le Aso Sa na tea nei na faia ai lea faaiuga faapitoa a le Kapeneta ma faia ai loa feuiuiaiga mo le sii atu i Niu Sila o le gasegase o le afioga i le minisita o le Kapeneta.

O loo faailoa i le pepa a le Kapeneta le tau atoa o le siiga gasegase e 81 afe ma le 73 tala ma le 69 sene tupe Niu Sila, poo se vaega tupe e silia i le 129 afe tala Samoa ma o loo faatupe i le polokalame a le malo o loo ave ai i fafo gasegase e le maua i Samoa ni togafitiga faafomai.

O lea tau atoa ua aofia ai ma le totogi o le vaalele ave ma’i poo le Air Ambulance e $75,000 tupe Niu Sila.