Ua faailoa lautele e le Ofisa Sili o le pulega o le matagaluega o pisinisi alamanuia ma leipa, igoa o nisi o pisinisi ua soloia ma aveesea ma le lisi o kamupani mai totonu o Samoa, ona o le lē tausisia o aiaiga o le tulafono faasino i ia auaunaga.

O nisi o kamupani sa faagaioia i le atunuu i ni tausaga ua mavae ae o lea faatoa soloia a latou lesitala e mafua i le lē tuuina atu o a latou lipoti faaletausaga o faamatalaga o tupe ma isi faamaumauga e tatau ona tuuina atu i le matagaluega o pisinisi alamanuia ma leipa.

O se tasi o kamupani mai fafo ua i se tulaga e faaleaoga ai le lesitala o le Sateherd Samoa Limited o lana auaunaga o fesootaiga tau satelite.

O le kamupani lea na tuuina atu iai se taofiga e faatino ai ana galuega ona o ni atugaluga na alia’e mai i le lamatia ai o le tulaga o le puipuiga o Samoa poo le national security.

O le ofisa tutotonu o lea kamupani sa i se faletalimalo i le taulaga i Apia,  sa galulue ai nisi o tagata mai Asia.

O le vaiaso nei foi ua faailoa ai e le Ofisa Sili o le matagaluega o alamanuia pisinisi ma leipa se faamanatu, i le lē tatau i tagata e lē o ni tagatanuu o Samoa ona aafia i ni faiga tau pisinisi i auaunaga ua na o tatou tagatanuu e agavaa iai.

O pisinisi ia e aofia ai pasi ma taavale laiti la’upasese, o pisinisi tau taavale totogi faalisi, o oloa faatau taitasi e faasino i meaai ma vaiinu, o ililaupapa faapea le lolomi ma le mamanuina o elei faaleaganuu.