Ua silia ma le 3 masina e le o toe faia ni feiloaiga masani a sooupu o le matagaluega o leoleo, falepuipui ma le ola toe fuataina ma le vasega o le autusitala e pei ona sa toe faatino ina ua filifilia le komesina o leoleo ua iai nei.
O lea ua faailoa e le Komesina le susuga Auapaau Logoitino Filipo i le nusipepa o le Samoa Observer e le toe faia ia feiloaiga masani, ae se’i vagana ni mataupu tetele.
E le o faailoaina e le komesina poo ā tonu ia mataupu tetele, ae talu nei ona mautu tapenaga a le matagaluega mo le faatuina o lana auaunaga faasalalau poo le media unit ua fesoasoani ai se polokalame a le Malo o Ausetalia e faatupe mea faigaluega e pei o meapueata ma masini pu’eleo, ua faailoa e le Komesina o le a faaaogā le latou auaunaga lea e faailoa ai soo se mataupu mai leoleo ma a latou galuega fai.
