O le a faamuta e le Federal Government a Ausetalia poo le faigamalo o loo iai nei le toe faaaogaina o le au aoaitalafu poo debt collectors e tulituli tupe o loo aitalafu ai tagata i le social welfare.

Fai mai o konekarate sa sainia i le va o le Commonwealth poo le faigamalo ma kamupani aoaitalafu nei i se taimi ua sola ua fuafua e mae’a i le faaiuga o le masina o Iuni o le tausaga nei ma o le a lē toe faafouina ia konekarate.

O le faasilasilaga lea mai le minisita Bill Shorten o ia lea o loo feagai ma le mataupu lea.

Fai mai le minisita o nisi aogāaitalafu i le lumanai o le a faatino uma lava e le Services Australia.

O le suesuega a le komisi suesue i le mataupu lea i le Robodebt sa aliali ai ma le tulaga lea i le au aoaitalafu ae o le faiga lea a le malo sa faia mo le fā tausaga e amata mai le 2015-2019.

O se faiga na tuuina ai faasolitulafono aitalafu i tagata e silia ma le 400 afe i lalo o lea faiga.

O le mafuaaga foi lea na uma ai le soifua o se tasi talavou mai le Sunshine Coast ina ua tulituliloa i ana aitalafu i le Centrelink.

Fai mai Shorten o le a faamautinoa e le faigamalo o iai nei e le toe faia lea ituaiga scheme le Robodebt.