I le mae’a ai o tulaga mataina i le tautua a le Faiaoga a le Toa Samoa, Mau a Pule Matt Parish ina ua maualuga le tulaga i le Ipu o le Lalolagi a le Lakapi Liki i le tausaga ua mavae ua faailoa ai i le asō lana faamavaega mai lona tofiga ae tuuina le avanoa i se tasi o le a tulai mai e taitaiina le ‘au mo tapenaga i le isi taamilosaga i le 2026.
E pei ona faasalalauina i lipoti a le NRL o le faaiuga o le tausaga ua mavae ina ua mae’a le Ipu o le Lalolagi i Peretania lea ma tulaga lua ai le ‘au a le Toa Samoa na malaga mai ai i Samoa ma faaee ai lona suafa matai ma fautuaina ai le laulau a le Lakapi Liki a Samoa mo lana filifiliga ua faia talu mai tausaga e tele sa faiaoga ai mo le ‘au.
“O se tofiga sa tele ni mea tāua e lē mafai ona ou faagaloina ae ou te talitonu o se taimi talafeagai foi lea ou te see ese ai ae tuuina le avanoa i se tasi o le a taitaiina le Toa Samoa ma ana tapenaga.
“O le agaga faafetai sa avea ai a’u ma se tasi o lenei ‘au aemaise o le agai i luma o le taumafaiga a alo o Samoa i lenei taaloga e pei ona tumatila ai Samoa ma faaeaina ai soo se Samoa i le lalolagi.
“Ou te fia momoli foi le faamalo i tama taaalo a le Toa Samoa ma lana pulega sa matou galulue faatasi mo la outou lagolago ma lo outou filiga i le taaloga.”
I upega o faamatalaga o loo faasalalauina ai e le Toa Samoa lagona foi o le faafetai mai le Peresitene a le Lakapi Liki a Samoa, Ponifasio Vasa ia Parish i lana tautua matavela i lana pitolaau lea ua molimauina e Samoa fua o ana galuega.
“Ua logologoā le tautua a lenei tamalii i le taaloga lakapi ua tele lona sao i le Toa Samoa ma e lē mafai ona faagaloina pe taumate foi lana tautua ia Samoa ma le atina’eina o taaloga i le Pasefika.
“E ui ina tele tala ma faitioga a tagata i lenei tamalii e lei avea ma faafitauli i lana tautua, o oe o se faamanuiaga ia Samoa atoa ma o le pine faamau o au galuega e pei ona iai le tulaga o Samoa i le Ipu o le Lalolagi o se mau lea i le talaaga o Samoa i le taaloga o le lakapi liki.”
Ua tolu taamilosaga o le Ipu a le Lalolagi i le lakapi liki sa tautua ai Parish mo le Toa Samoa faatasi ai ma nisi o taamilosaga i le Pasefika.
