Ua fā tausaga talu ona mae’a le toe tasi o le pulega o le soifua maloloina i le tuanai o le sefulu tausaga o ese le pulega o le matagaluega, ese le pulega o le auaunaga a le soifua maloloina.
O lea ua galulue nei le komisi o galuega a le Malo e faamautu le toe foi i le tasi le pulega o lea auaunaga tāua a le Malo, ona talu ona faatino le toe aveesea o le tuu mavaevae o pulega o itu e lua, e lei mautu lava fausaga o aiaiga o le pulega e pei ona faailoa e le Faatonu Sili Aoao o le soifua maloloina.
O le tasi lea o vaega tāua o feutanaiga o loo faatino i le taimi nei ina ua aliali mai se faagaulemalie o le asosi a fomai i le itu i o latou totogi ma alauni.
Ua faaalia e le Faatonu Sili le susuga Aiono Dr Alec Ekeroma i se faatalanoaga ma le polokalame o le Tanoa Ava a le Radio Samoa i le faaiuga o le vaiaso, e toaititi se vaega o le asosi o fomai o loo aofia i le mataupu i totogi ma o le Aso Lua o le vaiaso nei e feiloai atu ai le faatonu sili i le asosi e faamanino ai nisi o vala o le mataupu i totogi o fomai.
Le Faatonu Sili Aoao o le soifua maloloina i Samoa le susuga Aiono Dr Alec Ekeroma.
Ua ono masina talu ona avea o ia ma faauluuluga o le matagaluega o le soifua maloloina a lo tatou atunuu.
