I le tuana’i o ni tausaga o avanoa tofiga o le Komiti Faatonu e māta’itūina galuega ma auaunaga o le tomai faatusitala ma faasalalau i lo tatou atunuu le Samoa Media Council, o lea ua faamautū le filifilia o sui o lea Komiti Faatonu ina ua mae’a faasalalau nisi e fia galulue i lea itutino tāua o galuega faatusitala ma faasalalau a Samoa.
O le ulua’i Komiti Faatonu sa iai na mae’a lo latou taimi galulue i le 3 tausaga na faai’uina i le tausaga e 2019, peita’i sa tuai ona toe sa’ilia ni sui o lea itutino ona o le faama’i Koviti sa feagai ma le lalolagi e aofia ai Samoa faaopoopo iai ma nisi o to’a faalotoifale sa feagai ma le asosi o tusitala ma le aufaasalalau e gafa ma le sa’ilia o sui o lea Komiti Faatonu.
O le Aso Tofi ua mavae na feiloa’i ai sui o le JAWS le asosi o tusitala ma le aufaasalalau a le atunuu ma sui ua filifilia o le Komiti Faatonu e māta’itūina galuega a tusitala ma le aufaasalalau.
O le Komiti Faatonu ua iai nei:
- Sasa’e Fualautoalasi Walter (ta’ita’ifono, o se loia sinia)
- Rev. Dr. Siaosi Salesulu
- Professor Fui Leapai Asofou Soo
- Dr. Maria Talaitupu Kerslake
- Sifuiva Maureen Epati Tuimalealiifano (o se loia)
- Galumalemana Faiesea Matafeo
- Fiso Jennifer Key
- Sagapolutele Ulaulā Jensen
- Fa’aolo Utumapu Utailesolo
- Isalei Sioa
- Tonu’u Paul Smith
O le Aso Tofi o le vaiaso nei le ulua’i fonotaga a le Komiti Faatonu ma o le amataga lea o a latou galuega mo le 3 tausaga o le latou nofoa’iga.
O se tasi o galuega tāua a le Komiti Faatonu ua filifilia e pei ona aiaia i le tulafono o galuega faatusitala ma faasalalau a Samoa, o le su’esu’eina o faaseā mai le atunuu i ni faaletonu e aafia ai galuega a tusitala ma le aufaasalalau.
