O se faaiuga o le tausaga fiafia mo le tapuaiga a le Pule ma le vasega o faiaoga faapea le komiti o le aoga tulagalua a le afioaga o Samusu i Aleipata, le faamautu o le ioega a le Malo o Iapani, o le a latou faatupe le faleaoga fou o Samusu i le tau e $520 afe tala Samoa.
O le a fausia ai se faleaoga e valu potu ma le potu mo faiaoga. E faapena foi le sosaiete i Samoa o loo vaaia le saogalemu o meaola le Animal Protection Society, ua faapena ona talia e Iapani lona faatupeina o galuega a lea sosaiete o loo galulue e faaitiitia le taaloa o ta’ifau.
E $201,000 afe tala o le a maua e le sosaiete e faatino ai lea galuega. O le Aso Tofi o le vaiaso nei na faamautu ai ia fesoasoani i se sainiga lima i le va o sui o le aoga tulagalua a Samusu ma le sosaiete mo le puipuia o meaola ma le sui o le Malo o Iapani i Samoa.
O fesoasoani faaiu foi ia o lenei tausaga o le a mae’a, peitai ua toe tatala foi faitotoa o ia fesoasoani a lea Malo mo faalapotopotoga i lo tatou atunuu e talosaga ai mo le tausaga fou.
