E lima itu o se talosaga apili o le a suesueina e le Faamasinoga o Talosaga Apili a le Faamasinoga o Fanua ma Suafa, o le a lu’i ai le faaiuga na filifilia ai le afioga Faamausili Moli e nofo i le suafa Tupu o le Malietoa.
O lea faaiuga na fofogaina i le aso 22 o Tesema o le tausaga e 2017 ma ua lima ai nei tausaga talu ona faia lea faaiuga a le Faamasinoga o Fanua ma Suafa.
O le mae’a o lea faaiuga na faatino ai tu ma aga masani e tusa ma aganuu faasamoa o le faaeeina o pāpā o le suafa Malietoa lea na faataunuu i le afioaga o Malie i le masina o Aokuso o le tausaga na sosoo ai 2018.
O le Aso Gafua asau le aso 7 o Aokuso o le a tagofia ai lea talosaga apili i le faamasinoga i Mulinuu.
O itu o loo talosaga e toe iloilo le faaiuga, o le Susuga Papalii Titiuatoa Malietoa ma lana itu, Le Tagaloa Pitapola ma lana itu, Susuga Papaliitele Leiataualesa Lagolasi Faalataitaua ma lana itu, Papalii Kiwi Tamasese ma lana itu, ma Papalii Leota Talamesi Fitisemanu ma lana itu.
