O lea ua faamanino mai e le faigamalo a Niu Sa Uelese o le masina o Setema lea o le a aveese ai loa le tapulaa o loo iai i luga o totogi mo tagata faigaluega i auaunaga lautele, public sector.
O lenei mataupu ua leva foi ona finauina ma ua folasia mai i le asō se faamatalaga a le faigamalo e uiga i lea faaiuga, ua atoa ai le 100 o aso talu ona manumalo le Leipa i le palota a le Setete.
Ua faailoa i le faamatalaga mai le malo i le asō o le a faia se siitaga i le totogi o tagata faigaluega ia ma o le a siitia ai i le 4.5 pasene mai le 2.5 pasene o iai i le taimi nei.
O lenei fuafuaga ua ta’ua o le a faaalu ai le silia ma le 600 miliona.
Fai mai le teutupe mo NSW, Daniel Mookhey ua faia lea faaiuga i le mae’a o le mau faatalanoaga sa faia ma tagata faigaluega ua leva ona lē fiafia i lea mataupu ma o lea la ua ofoina ai se siitaga tele mo le aufaigaluega o auaunaga lautele ma e lē taumate o le a taliaina lelei e tagata uma.
