O le fa’aaogaina i se tulaga aloa’ia mo le a’oa’oina o fanau a Samoa o le Tusi Faatonu upu o le Gagana Samoa poo le lolomi fefiloi o le Gagana Samoa, ua faamautū nei i se faaiuga a le Kapeneta, ma ua talia ai ma le fautuaga e fa’aaoga le tatou gagana faapea le Gagana Peretania i le a’oa’oina o fanau i totonu o a’oga.
Mo le silafia o tausaga e tele ua tuanai sa lilifa aoga a le malo i Malifa i le faamalosia o le tautatala o fanau i taimi o aoga i le Gagana Peretania, a o fanau ua oo i aoga maualuluga e faasā ona faasamoa i totonu o potu aoga ae fa’aaoga le Gagana Peretania.
Fa’aalia e le Palemia i le fono ma tusitala i le faaiuga o le vaiaso ua mavae, o se tulaga e matuā tāua tele le fa’aaoga o gagana e lua i le taimi o a’oa’oga ae ia fasilisili le Gagana Samoa o le tatou faasinomaga. Ua tofu uma Minisita o le Kapeneta ma lolomi fefiloi poo Tusi Faatonu upu o le Gagana Samoa e pei ona faailoa i le upega tafailagi o auala o fesootaiga a le malo.
Sa taua’ao atu ia tusi mo le Kapeneta e le tama’ita’i ofisa sili ua filifilia nei e tauave le pulea o le Matagaluega o Aoga ma Aganuu faapea nisi o ofisa sinia o le Matagaluega.
O le tausaga na tea nei na faalauiloa aloaia ai le maea tuufaatasia o le tusi faatonu upu o le gagana Samoa, lea o le a faalauiloa i Niusila ile masina nei o Aperila.
