Ua teena ma le talia e le faamasinoga sili a le atunuu i sana faaiuga, le talosaga a le faipisinisi o Tuitama Iliganoa Sapolu, sa lisi i le maota o le Ioane Viliamu i Tamaligi lea sa faagaioi ai sona fale’aiga ma se fale e faatau ai laei eseese.

O lea talosaga ua ta’ua o le strike out motion sa finau ai Tuitama e taofi le tagi a le Komiti Faatonu o le pulega aoao o le Ekalesia Faapotopotoga Kerisiano Samoa le Board of Trustees, o loo finau ai le ekalesia e totogi atu le $30 afe tala o le lisi o loo nofo aitalafu ai le faipisinisi i le faaaogāina o le maota o le Ioane Viliamu o se meatotino ma se aseta a le ekalesia aoao.

O le teena o lea talosaga ua faatonuina ai le faipisinisi e totogi le 500 tala i le ekalesia, ae o isi totogi o le faamasinoga o le a faatali se’i mae’a ona suesue le mataupu autu poo le tagi lea a le Komiti Faatonu o loo finau ai e toe faaola atu tupe o le lisi o le nofoaga sa faia ai le pisinisi mai le tausaga e 2012 e oo mai ia Aokuso o le tausaga e 2015.

O mau na tuuina atu e le ekalesia i le suesueina o le talosaga a le tina faipisinisi o Tuitama Iliganoa Sapolu o loo faailoa ai o le aitalafu sa i se aofaiga e silia i le 70 afe tala, ae na faia se maliega e faaitiitia i le 30 afe tala ma le tuutuuga e togitogi tai 200 tala i le vaiaso.

Peitai o le taimi o vavao o le faamai Koviti-19 na tulaga faaletonu ai le pisinisi ma faapena ona toe fetuunai ai e le pulega o le ekalesia le aitalafu o le lisi.

O le aso 4 o le masina fou o Setema o le a toe valaau ai le mataupu lenei mo le faatulagaina o se aso e valaau ai molimau, poo le faia o se soalaupulega i le va o itu auai lea e ta’ua o le judicial settlement conference.