I le mae’a ai ona suesue moliaga a leoleo sa molia ai se tagata faigaluega sinia, o se Ofisa Sili o se tasi o auaunaga tumaoti a le Malo, o lea ua faailoa i luga o upega tafailagi o faai’uga o mataupu tau faamasinoga le faamaonia o moliaga e tolu o Salale Moananu, o le Ofisa Sili o pulega o nofoaga mo taaloga e pei o fale ma malae taalo le Samoa Sports facilities.
E lima moliaga sa tuua’ia ai Salale e mafua i se tagi a se alii leoleo e mafua i se feteenaiga na tulai mai i le va o lē na molia ma lē na tagi lea sa tagofia ai e Salale se laau malosi sa i totonu o le taavale a le Malo sa malaga ai.
O Novema o le tausaga na te’a nei na suesue ai molimau i luma o le tamaitai faamasino sinia o le Faamasinoga Faaitumalo le afioga Talasa Atoa Saaga, ae o Mati o le tausaga nei na lau ai le faai’uga o ia suesuega ma faamaonia ai moliaga e tolu faasaga i lē na molia.
O moliaga ia o le faalālā o le fana, umia o se aupega matautia ma le moliaga o le lafo o ni upu taufaamata’u o le faaoo o le oti.
E lei faamaonia moliaga e lua a leoleo o le faaoolima ma le umia o se laau malosi i se auala faasolitulafono.
O le laau malosi sa tauave e lē ua molia i lana taavale o se meatotino a se isi tagata e taalo i le taaloga fanafana, ma o le aupega lea sa faamatala e lē na tagi i lana molimau sa o la vaaia ma lona toalua o tago iai lē ua tuua’ia i le taimi na tupu ai le feteenaiga.
Na mafua lea tulaga ona ua faailoa i faamaumauga a leoleo e faapea, ina ua oso ane le taavale a lē ua molia a o alu i se vaega o le alatele i Tuanaimato, na tauau e lavea ai le taavale a lē na tagi sa malaga ai ma lona toalua.
O le mafuaaga lea o le feteenaiga na tupu ma vili ai loa leoleo i Tuanaimato.
O Iulai o le tausaga e 2022 na tulai mai ai lenei solitulafono, o le tausaga na te’a nei ia Novema na suesue ai molimau, ae lau le faai’uga ia Mati o le tausaga nei.
E faailoa i luga o upega tafailagi lenei faai’uga e lē o iloa poo ua faia se faasalaga o moliaga e tolu ua faamaonia faasaga i lē na molia.
