O le Aso Gafua 16 o le masina nei o Novema ua fa’atulaga e le fa’amasinoga fa’aitumalo i Mulinuu, e pei ona fa’ailoa mai e le resitala sinia o le Fa’amasinoga ma le Ofisa Sili o le pulega o le Matagaluega o Fa’amasinoga ma le Fa’afoeina o Mataupu tau i le Faamasinoga susuga Papalii John Taimalelagi Afele, o le a lau ai le faai’uga i se fa’asalaga o le ali’i o Aumaga Aloali’i 49 tausaga le matua o Saleapaga ma Aua i Amerika Samoa, ina ua ioe i moliaga e tolu e aofia ai solitulafono o le lafo o upu tau faamata’u na ia folasola ai lona faao’o o le maliu i le Palemia ma le solitulafono o le faia o upu tau faifai.

O le masina o Aukuso o le tausaga nei e pei ona silafia, na fa’atino ai e le afioaga o Saleapaga le ifoga i le Palemia ona o upu na lafo e le ua molia sa fa’aaoga ai feso’ota’iga ile upega tafā’ilagi o le api o foliga le Facebook.

Na talia ai e le palemia susuga, Laaulialemalietoa Leuatea Polataivao Fosi, le ifoga a le afioaga ae molia e leoleo Aumaga Aloali’i. O le masina o Setema na vala’au ai ona moliaga ma ia ioeina ai moliaga uma.