O le lalata atu o le Asosi e fa’amanatu le 30 tausaga talu ona a’o’oga tama’ita’i fa’atasi ma ali’i i le Kolisi, ua silasila mamao ai le Asosi e fesoasoani i fanau a le Kolisi i ni avanoa sikolasipi mo fanau o lo’o feagai o latou aiga ma tulaga faigata tau tupe.

Ua fa’ailoa e le Peresetene le susuga Tupa’i Tagaloaatoa Tauiliili Albert Atoa, o le Aso Faraile o le vaiaso fou e amata ai polokalame o le 30 tausaga lea ua fa’amoemoe o se seleni e maua i le latou taumafataga afiafi e totogi laulau poo se corporate dinner o le a fa’atupe ai lea fuafuaga.

Le pelesetene o le asosi o tama ma teine tuai o le kolisi o Avele susuga Tupa’i Tagaloaatoa Tauiliili Albert Atoa.

O le savali ile taulaga i Apia i le Aso Faraile o le vaiaso asau o le a amata ai polokalame o le samiina o le atoaga o le 30 tausaga talu ona talia le ulufale o tama’ita’i o le atunuu e a’oa’oina i totonu o le Kolisi o Avele. O le taunu’u o le savali a tama’ita’i na ulufale i le Kolisi mai le 1996 e oo mai i le tausaga nei 2026 o le a faia ai se sauniga i lumā maota o le malo i ‘Eleele fou.

O le po o le Aso Faraile lava o le vaiaso asau e faia ai le taumafataga o le afiafi e totogi laulau poo corporate tables.

O le Aso Toonai o le aso ta’alo ae taualuga le 30 tausaga i le sauniga lotu e faia i le Aso Sa i le laumua o le Kolisi o Avele. O le kamupani malosi o loo gaosia le beer o le Vailima o le lagolago autū lea o le 30 tausaga talu ona talia tama’ita’i i le Kolisi o Avele.