Ua fa’atali nei le ali’i o Michael Gibson o se tagatanu’u o Niu Sila pe talia pe tē’ena i se faai’uga a le fa’amasinoga lana talosaga e fia malaga i Aotearoa, a’o tālia ai le su’esu’eina o ona moliaga e tolu i solitulafono o lona umia ma le fa’aulufale i Samoa o nakoti poo la’au fa’asāina o le maruana.

E 38 kalama le mamafa o ia la’au fa’asāina sa fafao mai i se fagu shampoo lea na maua i galuega masani a le Ofisa o le Tiute o le siakiina o meli e taunu’u i le falemeli i Apia.

Ua tu’uina atu le tali tete’e a Michael Gibson i moliaga uma a leoleo, ma ua fa’atali le fa’atulagaina o se aso e su’esu’e ai e le fa’amasinoga molimau se’i tālia se faai’uga o lana talosaga ua mae’a ona iloiloina i le toe fetu’una’i o aiaiga o lo’o tatala ai i tua e pei ona mana’o e tu’ua Samoa.

O lea tagatanu’u o Niu Sila o se tasi o le aufaigaluega a se kamupani pu’eata tifaga mai Niu Sila o lo’o pu’eina se ata tifaga i lo tatou atunu’u. Sa molimauina i le su’esu’eina o lana talosaga e fia tu’ua Samoa le auai o nisi o lea au pu’eata i taualumaga a le fa’amasinoga i le Aso Lulu o le vaiaso nei.