A’o fa’agasolo ai pea su’esu’ega a leoleo i le tino maliu o se tama tane na maua i se vaega o le vaitafe o Fuluasou i le vaiaso nei, o le Aso Lulu o le vaiaso nei na maua ai i sā’iliga a leoleo i le sami i gataifale o Satapuala le tino maliu o se tama ua 44 tausaga le matua o le soifua.

O le faasalalauga mai le Matagaluega o Leoleo, Falepuipui ma le Toefuata’ina o loo ta’ua ai na malemo lē ua maliu. O le Aso Lua na sā’ilia ai e lona aiga se fesoasoani mai leoleo i Faleolo ma faia ai sā’iliga ae na fa’ato’a lona tino maliu i le Aso Lulu.

Ua fa’amalieina le pule o maliu poo le coroner i le mafua’aga o le fano o le soifua o le tamā 44 tausaga ma o le masina o Mati o le tausaga fou o le a fofogaina ai i le Fa’amasinoga o maliu lilo lea mataupu. O loo iai foi se isi mataupu lava tau i maliu o lo’o su’esu’eina e leoleo o se teineititi 7 tausaga le matua na pa’ū mai luga o se pa ma’a ma a’afia i ni manu’a e feso’ota’i i le fano o lona ola.

O le Aso Lua o le vaiaso nei na lipotia ai i leoleo lea mataupu. Ua fa’amauina ai e tolu maliu o loo su’esu’eina e leoleo talu mai le amataga o lenei vaiaso ua lata ina mae’a.