E to’alua ni ali’i o le pasese a le va’a o le Lady Samoa IV mai Pagopago i Amerika Samoa i le po o le Aso Toonai na te’a nei, ua tu’uina atu e le Ofisa o le Tiute i le Matagaluega o Leoleo, Falepuipui ma le Toefuata’ina mo su’esu’ega e mafua i le galuega masani a ali’i ma tama’ita’i o le tiute o le siakiina o uta ma pasese, se tasi o aumai fa’asolitulafono nakoti poo la’au faasāina o le maruana, a’o le isi na maua i lana ‘ato o fafao mai ai se la’au malosi e aunoa ma se pemita fa’ataga.

O ia ali’i o le isi ua 25 tausaga a’o le tasi ua 42 tausaga le matutua o ni tagatanu’u o Samoa. Ua fa’aalia ai e le Ofisa Sili o le Matagaluega o le Tiute e le’o nofoa’i lana aufaigaluega i le mata’itū lelei o oloa ma uta o loo fa’aulufale mai i le atunu’u ina ia siaki mae’ae’a ina ia taofia ai faiga solitulafono.

E le gata ina fa’aulufale mai maruana ma le la’au malosi e aunoa ma se fa’atagaga, ae na aumai foi e aunoa ma le fa’ailoaina i pepa fa’atumu mo pasese e iloa ai oloa ‘ese’ese o loo aumai i uta ma fa’a’momoli.

E pei ona silafia e lē o se taimi muamua lea ua maua ai ni la’au fa’asāina o aumai i malaga a le vaa la’upasese o le Lady Samoa IV i le va o Pagopago ma Apia. O le fuala’au fa’asāina o le ‘aisa na maua foi o nanā mai totonu oni pusamoa i uta sa aumai i le atunu’u i nisi o malaga lava a lea va’a la’upasese a lo tatou malo.