E 1.5 miliona le tupe fesoasoani ua faamatuu mai e le Malo Amerika e tauala mai i le USAID poo le faalapotopotoga fesoasoani faavaomalo a lea atunuu.
O lea tupe e fesoasoani mo tagata lautele o loo iai mafatiaga.
E lua ni faalapotopotoga o loo faamatuu atu iai lea tupe o le Faalapotopotoga o Fesoasoani ma Atinae, o le Ekalesia Aso Fitu le ADRA faapea ai Tina Faipisinisi mo Atinae le WIBDI.
E silia i le 500,000 le tupe ua tuuina atu i le ADRA, aua ana galuega e pei o le fesoasoani mo avanoa e toe faaleleia ai le soifuaga o tagata, o le taumafaiga ia faaoloatauina tina ma tamaitai, atoa ai ma manaoga o pulega o loo latou galulue e laveai le soifua mai faalavelave faanatura ma faalavelave tutupu faafuasei.
E tusa ma le 14,000 tagata o le a manuia mai lea fesoasoani ua tuuina atu i le ADRD.
O tina faipisinisi ua tuuina atu iai le silia i le 900,000, aua le puipuia o faatoaga niu mai le faatama’ia e le manu ainiu e faaaogaina ai metotia faanatura o mea ae le o vailaau.
E 2000 aiga ua faamoemoe o le a faamanuiaina mai lea fesoasoani.
O le aao galue lenei o le Malo Tele o Amerika na tatalaina i le 2020 ma le faamoemoe e faamatuu mai fesoasoani nei ina ia laveai ai ma faamalosia tagata o le Pasefika o loo pagatia ina ia mautinoa e saoloto mai faafitauli ona o suiga o le tau ma faalavelave tutupu faafuasei.
