O le meli la’upasese o le Norwegian Spirit sa afea lo tatou tunu’u i le Aso Tofi ua mavae sa malaga mai ai ni turisi poo ni tagata tafafao se to’alua sa agai i le matafaga lauoneone pa’epa’e i Lalomanu ma tā’e’ele ai.

O le la ta’elega lea sa ‘au’au ai i gataifale o lea afio’aga ma matamata i i’a ma figota o le sami, ae maliliu ai. Ua fa’aalia ai e le pulega o fale apitaga mo turisi i Lalomanu le Taufua Beach Fales sa saogalemu uma ana malo sa nonofo ai i le aso na tula’i mai ai lea faalavelave; ae o nisi o lana au faigaluega sa fesoasoani i le sailia o turisi ua maliliu ina ua logotala i le mea na tupu.

Ua molimoli ai fa’amaisega ma lagona fa’anoanoa o lea pisinisi tau tagata tafafao iai latou ua afea lagona i le fa’anoanoa ona o le maliliu o ia tagata tafafao e to’alua ao tā’e’ele i gataifale o le matafaga i Lalomanu. Ua fa’ailoa foi e le pulega o le Taufua Beach fales i lana upega tafāilagi o ana malo uma e afea le latou auaunaga mo tafaoga ma nonofo ai, e faamalamalama ma fa’ailoa iai vaega o le ogasami e lē tatau na oo iai a latou tā’elega ma turisi e fia ‘au’au ma a latou mata fagota e fia matamata i le ola faalenatura o lona gataifale.

Ua fa’ailoa i se ripoti sa fa’atino e nisi sa iai i le matafaga i le aso na tupu ai le fa’alavelave taumafaiga uma mo le fa’asaoina o soifua o turisi ua maliliu peita’i na siliga tali i seu.

Ua fa’ailoa i ni manatu fa’aalia i luga o upega tafailagi ua tatau ona iai se laupapa fa’ailoilo e fa’ailoa ai i turisi ma tagata e āfea lea nofoaga mo tafaoga ma tā’elega e fa’asilasila ai vaega o le ogasami e lē tatau ona oo iai ina ia saga malu ai le puipuiga o le saogalemu o ola ma soifua.

O lea nofoaga e tumutumu iai tafaoga ma tā’elega i aso mālōlō o aso fa’ailogaina aemaise e lolofi fo’i iai tagata tafafao e fia nonofo ai.