Ua viia le faatonufolau a le Faamasinoga o Apili e ala i lana faaiuga i le Aso Gafua o le vaiaso nei e le Afioga i le Fofoga Fetalai o le Fono Aoao Faitulafono a Samoa o loo atagia ai le tulaga manino e tatau ona aiaia ai mataupu i uiga taualoa o sui faipule e ala lea i le iai o se Tulafono a le Palemene.
O se pepa o faamatalaga mai le Ofisa o le Fofoga Fetalai o le Fono Faitulafono a Samoa o loo faaalia ai e Papalii Li’o Ta’eu Masepa’u, o se mataupu e tatau ona ave iai le faamuamua ma ia tagofia i se taimi vave.
Ua ia toe faamanino mai foi e tusa ai ma le faaiuga a le faamasinoga e iai lea i le Fono Aoao Faitulafono le malosiaga e faia ai sana faaiuga e tusa ai ma le tulaga ua faalavelaveina ai ana faaiuga fai i totonu o le Palemene.
O lea tulaga e faia a o tālia ai taumafaiga e foia le faafitauli o loo faailoa mai i le faaiuga a le Faamasinoga talu mai le tutoatasi o le atunuuu ma le fesuia’i o pulega lea sa faatino lava tulaga uma e faaaogā ai tulafono tumau nai lo le faaaogāina o se tulafono a le Palemene.
O ia tulaga sa faia lava e Pulega Faatonu ma faigamalo e ala i le faia o ni aiaiga faapitoa i totonu o le tulafono o Pule ma Tulaga Aloaia o le Fono Aoao Faitulafono 1960.
Ua ta’ua e Papalii, e ui i le tele o tausaga o faatino malosiaga ma le pule a le Fono Aoao Faitulafono e faamalolo lē tumau ai sui usufono e tusa ma aulape o lana tulafono tumau, o ia malosiaga sa tatau ona aiaia i se tulafono e pasia e le Palemene.
Talu ai lea tulaga o le ala lea o le faalēaogāina ai e le Faamasinoga o Talosaga Toe Iloilo le faamalolo lē tumau ai o le sui usufono o Lepa ma Faleata 3 i le 2022 ma faatumauina le faaiuga a le Faamasinoga Maualuga e toe tuuina atu uma ai totogi o ia sui usufono o le Maota, o se tulaga o loo faapea mai Papalii ua mae’a faatino ma tuuina atu se tapulaa o tupe e tatau ona totogi atu.
O le faaiuga a le Faamasinoga Toe Iloilo na toe susue ai i luga le tulafono faavae ma uluai tulafono na pasia lea na tuuina mai ai loa lana faaiuga i le Aso Gafua i le mae’a ai o le silia i le masina o tālia.
